அழுத்தப்படும் விசை

¤
அழுத்த நெருங்கும் விரலுக்கும்
விசைக்கும் இடையே
சிக்கி நசுங்குகிறதொரு மூச்சுக்காற்று!


¤
துப்பாக்கியோடு நிற்கும் உன்முன்
நிற்கிறேன் நான் ஏதுமற்று
என்றோ உனக்குக் கொடுத்தவொரு
முத்தத்தைத் தவிர!

¤
வெடித்தபின் விசையை
மாற்றி அழுத்தத் துடிக்கிறான்
கை நடுங்க ஒருவன்!
 
¤
என்னை நோக்கி
விசை அழுத்தத் துடிப்பவனே
கொஞ்சம் பொறுத்திரு.
கழற்றிக் கொள்கிறேன்
சிறுகிழிசல் கூட இல்லாத
என் சட்டையையாவது!
-வைகறை